ប៉ូលីសដើរវ៉ៃគេ ខែវិច្ឆិកា 15, 2013
Posted by មេឃា in Cambodia Feature Stories.add a comment
ការរៀបរាប់របស់រដ្ឋាភិបាលនិងប្រព័ន្ធផ្សព្វផ្សាយសង្គមខុសគ្នាស្រឡះ
Source : http://www.cambodiadailykhmer.com/news/7344/
ដោយ Kuch Naren and Colin Meyn – November 15, 2013
ទាល់តែឃើញទើបជឿ ជាពិសេសនៅក្នុងប្រទេសមួយដែលរដ្ឋាភិបាលគ្រប់គ្រងប្រព័ន្ធផ្សព្វផ្សាយ និងព័ត៌មានផ្សាយតាមបណ្ដាស្ថានីយទូរទស្សន៍ និងវិទ្យុសុទ្ធគាំទ្ររដ្ឋាភិបាល ដែលជាញឹកញាប់មានការខ្វែងគំនិតគ្នាជាមួយនឹងស្ថាប័នប្រព័ន្ធផ្សព្វផ្សាយឯករាជ្យនៅក្នុងប្រទេសកម្ពុជា។
ប៉ុន្តែក្រោយពីហេតុការណ៍ប៉ះទង្គិចគ្នាដ៏ហិង្សាមួយរវាងក្រុមកម្មករកាត់ដេរនៅរោងចក្រអេសអិល និងនគរបាលបង្ក្រាបកុបកម្មនៅជិតស្ពានស្ទឹងមានជ័យ ក្នុងខណ្ឌមានជ័យកាលពីថ្ងៃអង្គារ ធ្វើឲ្យអ្នកឈរមើលម្នាក់បាត់បង់ជីវិតនោះ ការរៀបរាប់ផ្លូវការរបស់រដ្ឋាភិបាលនូវហេតុការណ៍នោះត្រូវបានច្រានចោលដោយវីដេអូ ដែលត្រូវបានបង្ហោះតាមអ៊ីនធើណិត ហើយផ្សាយពាសពេញគេហទំព័របណ្ដាញទំនាក់ទំនងសង្គម។
នៅក្នុងយុគសម័យមួយ ដែលទូរស័ព្ទប្រភេទស្មាតហ្វូននិងអ៊ីនធើណិតមានគ្រប់កន្លែង រដ្ឋាភិបាលមិនអាចគ្រប់គ្រងរូបភាពដែលប្រជាជនចង់មើលបានឡើយ។ សាក្សីនិយាយថា នៅក្នុងរយៈពេលពីរថ្ងៃកន្លងមកនេះ ស្ថានីយទូរទស្សន៍មួយចំនួនក្នុងចំណោមស្ថានីយទូរទស្សន៍ទាំងប្រាំបួនបានធ្វើសេចក្ដីរាយការណ៍អំពីហេតុការណ៍ប៉ះទង្គិចគ្នានៅក្នុងខណ្ឌមានជ័យ ដែលបង្ហាញពីទិដ្ឋភាពនគរបាលក្លាយជាជនរងគ្រោះ ដោយសារត្រូវក្រុមបាតុករគប់ដុំថ្មដាក់ ប៉ុន្តែមិនបានបង្ហាញពីទិដ្ឋភាពមន្ត្រីនគរបាលបាញ់គ្រាប់កាំភ្លើងពិតទៅលើបាតុករឡើយ ដោយនៅក្នុងហេតុការណ៍នោះស្ត្រីអ្នកលក់អាហារតាមចិញ្ចើមផ្លូវម្នាក់ឈ្មោះ អេង សុុខុំ អាយុ៤៩ឆ្នាំបានត្រូវគ្រាប់ស្លាប់ និងជាច្រើននាក់ផ្សេងទៀតរងរបួស។
ចំណែកឯខាងនគរបាលវិញ ពួកគេបានបដិសេធថា មិនបានបាញ់គ្រាប់ពិតទេ ហើយនិយាយថា ពួកគេបានប្រើប្រាស់តែឧស្ម័នបង្ហូរទឹកភ្នែក និងគ្រាប់កាំភ្លើងជ័រប៉ុណ្ណោះ។នៅក្នុងវីដេអូមួយ ដែលអង្គការសិទ្ធិមនុស្សក្នុងស្រុកលីកាដូ បានបង្ហាញកាលពីថ្ងៃពុធ រូបភាពបង្ហាញយ៉ាងច្បាស់ពីទិដ្ឋភាពនគរបាលបង្ក្រាបកុបកម្មយ៉ាងហោចណាស់ពីរនាក់បែរមុខទៅបាតុករ ហើយបាញ់កាំភ្លើងខ្លីរបស់ខ្លួនជាច្រើនគ្រាប់ទៅ លើបាតុករទាំងនោះ។
នៅក្នុងឈុតឆាកមួយទៀតក្នុងវីដេអូរបស់អង្គការលីកាដូ នគរបាលបានស្រែកគំហកគំរាមយុវជនម្នាក់ដែលអះអាងថា រូបគេជានិស្សិត ដោយសួរថា ហេតុអ្វីបានជាយុវជនរូបនោះនៅកន្លែងតវ៉ា។ នគរបាលម្នាក់បាននិយាយទៅកាន់យុវជននោះថា “អញនឹងបាញ់សម្លាប់ហ្អែងហើយយកខ្មោចហ្អែងបោះចោល”។
ការអះអាងរបស់រដ្ឋាភិបាលដែលថា នគរបាលគ្រាន់តែការពារខ្លួននោះ ក៏ត្រូវបានលាតត្រដាងការពិតដែរ ដោយសារវីដេអូបង្ហោះពេញហ្វេសប៊ុកបង្ហាញពីភាពសាហាវព្រៃផ្សៃហួសហេតុ ដែលកងកម្លាំងនគរបាល និងកងរាជអាវុធហត្ថធ្វើទៅលើជនស៊ីវិលគ្មានអាវុធនៅក្នុងដៃរួមទាំងព្រះសង្ឃផង។ វីដេអូមួយ មានចំណងជើងថា “វ៉ៃ វ៉ៃ វ៉ៃ” ដែលត្រូវបានបង្ហោះតាមគេហទំព័រយូធូប បង្ហាញពីសកម្មភាពនគរបាលបង្ក្រាបកុបកម្ម និងកងរាជអាវុធហត្ថវាយដំដោយគ្មានធម៌មេត្តាទៅលើយុវជន ដែលមិនតតាំង។ អ្នកខ្លះបានរងរបួសជាំខ្លួនប្រាណ និងបាក់ឆ្អឹង។
វីដេអូនោះមានអមដោយបទចម្រៀងមួយបទដែលមានចំណងជើងថា “ដើរវ៉ៃគេ”។ តារាចម្រៀងរូបនោះបានសួរកងកម្លាំងសន្ដិសុខថា “បងប្រុសហេតុអ្វីបានជាបងធ្វើបែបនោះ? គ្មានអ្នកណាស្រលាញ់ចូលចិត្តបងទេ។ បងគួរតែធ្វើរឿងល្អវិញទើបជាការប្រសើរ”។
យុវតី គឹម មួយលីង ជាសិស្សវិទ្យាល័យថ្នាក់ទី១១នៅក្នុងខេត្តកំពង់ចាម បាននិយាយកាលពីម្សិលមិញថា នាងតក់ស្លុតយ៉ាងខ្លាំងនៅពេលនាងបើកវីដេអូយូធូបតាមទូរស័ព្ទអាយហ្វូនហ្វ័ររបស់នាងកាលពីថ្ងៃពុធ ហើយឃើញអ្វីដែលបានកើតឡើងនៅក្នុងខណ្ឌមានជ័យ រាជធានីភ្នំពេញ។ នាងបាននិយាយបន្ថែមទៀតថា “វាគួរឲ្យតក់ស្លុតយ៉ាងខ្លាំង ពីព្រោះពួកគេវាយដំមនុស្សគ្រប់គ្នាខ្លាំងៗនឹងដំបងនិងទាត់ធាក់ពួកគេដោយគ្មានមេត្តាធម៌”។
លោក ផៃ សីុផាន អ្នកនាំពាក្យទីស្ដីការគណៈរដ្ឋមន្ត្រីបានមានប្រសាសន៍ថា រូបភាពអ៊ីនធើណិតបង្ហាញពីប្រតិបត្តិការរបស់នគរបាលគឺគ្រាន់តែជាទិដ្ឋភាពមួយជ្រុងប៉ុណ្ណោះ ហើយមិនបានបង្ហាញពីទង្វើហិង្សារបស់បាតុករឡើយ។ លោកបានមានប្រសាសន៍ថា រដ្ឋាភិបាលមិនខ្វល់នឹងសេចក្ដីរាយការណ៍រិះគន់តាមប្រព័ន្ធផ្សព្វផ្សាយសង្គមឡើយ ពីព្រោះគណបក្សកាន់អំណាចមាន “ប្រព័ន្ធផ្ទាល់ខ្លួនរបស់យើងសម្រាប់ពន្យល់បកស្រាយប្រាប់ប្រជាពលរដ្ឋ [ពីអ្វីដែលបានកើតឡើងពិតប្រាកដ]។ យើងមានបណ្ដាញផ្ទាល់របស់យើង។ ប្រសិនបើប្រព័ន្ធផ្សព្វផ្សាយនិយាយមិនល្អពីរដ្ឋាភិបាល វាជាជម្រើសរបស់ពួកគេ”។
ជាការពិតណាស់ មានរូបភាព និងវីដេអូជាច្រើនផ្សាយតាមអីុនធើណិត ដែលបង្ហាញពីបាតុករដុតបំផ្លាញរថយន្តនគរបាល ហើយព្រះសង្ឃគង់នៅវត្តស្ទឹងមានជ័យគប់ដុំថ្ម និងដុំឥដ្ឋធំៗដាក់នគរបាល។
លោក អំ សំអាត មន្ត្រីឃ្លាំមើលជាន់ខ្ពស់ នៅអង្គការសិទ្ធិមនុស្សក្នុងស្រុកលីកាដូ បានមានប្រសាសន៍ថា វីដេអូចែករំលែកតៗគ្នាតាមប្រព័ន្ធផ្សព្វផ្សាយសង្គម បានបង្ខំឲ្យគណបក្សប្រជាជនកម្ពុជា និងគណបក្សសង្គ្រោះជាតិ ទទួលខុសត្រូវចំពោះទង្វើរបស់ពួកគេ។ លោកមានប្រសាសន៍ថា “ពួកគេត្រូវតែយកចិត្តទុកដាក់ឲ្យបានខ្ពស់ចំពោះឥទ្ធិពលនៃប្រព័ន្ធផ្សព្វផ្សាយសង្គម ពីព្រោះរូបថត និងរូបភាពវីដេអូបង្ហោះតាមប្រព័ន្ធផ្សព្វផ្សាយសង្គម នឹងបង្ហាញការពិតគ្រប់យ៉ាង ទាំងល្អ ទាំងអាក្រក់ ពីទង្វើរបស់ភាគីទាំងនោះ”។
លោកបានបន្ថែមទៀតថា អ្នកដែលទទួលបានអត្ថប្រយោជន៍ពីបណ្ដាញព័ត៌មានថ្មីទាំងនេះ មិនមែនមានតែយុវជននៅក្នុងទីក្រុងទេ។ លោក អំ សំអាត បានមានប្រសាសន៍បន្តថា “មនុស្សចាស់ភាគច្រើននៅតាមខេត្តក៏ចេះប្រើប្រព័ន្ធផ្សព្វផ្សាយសង្គមដែរ ពីព្រោះកូនៗបង្រៀនពួកគាត់ឲ្យចេះប្រើប្រាស់ [ទូរស័ព្ទស្មាតហ្វូន] និងមើលវីដេអូ”។
តែទោះជាយ៉ាងណា លោក ឆាយ ធី មន្ត្រីឃ្លាំមើលនៃអង្គការសិទ្ធិមនុស្សអាដហុក ប្រចាំខេត្តរតនគិរីបានមានប្រសាសន៍ថា ការប្រើប្រាស់ប្រព័ន្ធផ្សព្វផ្សាយសង្គមនៅមានកម្រិតនៅឡើយនៅក្នុងតំបន់ជនបទជាច្រើន។ លោកបានមានប្រសាសន៍ថា “ប្រជាពលរដ្ឋភាគច្រើននៅក្នុងខេត្តដាច់ស្រយាលនេះ [រតនគិរី] មិនអាចប្រើប្រាស់ប្រព័ន្ធផ្សព្វផ្សាយសង្គម ដើម្បីតាមដានព្រឹតិ្តការណ៍បច្ចុប្បន្នបានទេ”។
តែទោះជាយ៉ាងណា ប្រព័ន្ធផ្សព្វផ្សាយសង្គមមានប្រសិទ្ធភាពខ្លាំងណាស់ហើយសង្គមស៊ីវិលមានការព្រួយបារម្ភយ៉ាងខ្លាំង ខ្លាចរដ្ឋាភិបាលព្យាយាមរឹតបន្ដឹងសេវាប្រព័ន្ធផ្សព្វផ្សាយសង្គម នេះបើតាមប្រសាសន៍របស់លោក ព្រាប កុល នាយកប្រតិបត្តិនៃអង្គការតម្លាភាពកម្ពុជា។ លោកបានមានប្រសាសន៍ថា “ប្រជាពលរដ្ឋកាន់តែច្រើនប្រើប្រាស់ប្រព័ន្ធផ្សព្វផ្សាយសង្គម ប្រជាពលរដ្ឋកាន់តែច្រើនក្លាយជាអ្នកកាសែត គណបក្សប្រជាជនកម្ពុជានឹងប្រឈមបញ្ហាជាច្រើនក្នុងការគ្រប់គ្រងព័ត៌មាន”។
លោក ខៀវ បុរី ដែលបម្រើការងារឲ្យទីភ្នាក់ងារទេសចរមួយនៅតាមបណ្ដោយព្រំដែនថៃ ក្នុងក្រុងប៉ោយប៉ែតបាននិយាយថា ទូរស័ព្ទប្រភេទស្មាតហ្វូន ម៉ូដែលសាំស៊ុង កាឡាក់ស៊ី របស់គាត់ ធ្វើឲ្យគាត់អាចតាមដានព្រឹត្តិការណ៍បានភ្លាមៗនូវអ្វីដែលបានកើតឡើងនៅក្នុងរាជធានីភ្នំពេញកាលពីថ្ងៃអង្គារ។
គាត់បាននិយាយថា “ប្រជាពលរដ្ឋនៅក្នុងក្រុងនេះប្រើប្រាស់ទូរស័ព្ទស្មាតហ្វូន ដើម្បីមើលរូបភាពវីដេអូតាមយូធូប ហ្វេសបុក និងបណ្ដាញទំនាក់ទំនងសង្គមផ្សេងៗទៀត។ ប្រព័ន្ធផ្សព្វផ្សាយសង្គមកំពុងតែដើរតួនាទីយ៉ាងសំខាន់ក្នុងការប្រាប់យើងថា អ្វីជាស្ថានភាពពិតប្រាកដ ដែលកំពុងកើតមានឡើងនៅទូទាំងពិភពលោក ជាពិសេសអំពើអយុត្តិធម៌ក្នុងសង្គមនៅក្នុងប្រទេសកម្ពុជា ដែលមិនដែលចាក់ផ្សាយតាមទូរទស្សន៍ក្នុងស្រុក”៕
ប៉ូលីសនរក ខែវិច្ឆិកា 12, 2013
Posted by មេឃា in Cambodia Feature Stories.add a comment
វីដេអូរយៈពេល ៧:៥២ នាទី របស់ វិទ្យុអាស៊ីសេរី ខាងក្រោម បង្ហាញពី ក្រុមប៉ូលីសពាក់ស្លាក កម្ពុជា ប្រើកម្លាំងវាយលើ ជនស្លូតត្រង់ ដែលមានវត្តមាន នៅក្បែរ ទីដែល មានការប៉ះទង្គិចគ្នា ដ៏ខ្លាំងក្លាមួយ រវាងក្រុមកម្មកររោងចក្រអេសអិល និងមន្ដ្រីប៉ូលីស នៅម្ដុំមុខវត្តស្ទឹងមានជ័យ កាលពីព្រឹកមិញថ្ងៃទី១២ ខែវិច្ឆិកា ឆ្នាំ០១៣។ លទ្ធផលកាន់តែអាក្រក់ ស្ត្រីអ្នកលក់បាយម្នាក់ បានស្លាប់ភ្លាមៗ ដោយគ្រាប់កាំភ្លើង និងកម្មកររោងចក្រ អេស អិល ប្រមាណជា ២០នាក់ បានរងរបួសធ្ងន់ នៅក្នុងហេតុការណ៏។ ព្រះសង្ឈ និស្សិត ពលរដ្ឋ អ្នករត់ម៉ូតូឌុប ដែលនៅកន្លែងកើតហេតុ ត្រូវបានរាយការណ៍ថា បានចាប់ខ្លួន… ទស្សនាវីដេអូរួចហើយ ចង់តែដាក់ទំនាយឱ្យ ប៉ួលីសអស់ហ្នឹងទៅនរកវិញទេ !!! ឡើងមកឋានមនុស្សធ្វើអ្វី !???
នាយករដ្ឋមន្រ្តីខ្មែរប្រាប់រាស្រ្តថា គណបក្សប្រជាជនកម្ពុជាស្លូតត្រង់ ខែមិថុនា 14, 2013
Posted by មេឃា in នាយករដ្ឋមន្ត្រី, Cambodia Feature Stories.add a comment
មេឃា ៖ គូប្រជែងដ៏មានសក្តានុពលអាចតទល់ជាមួយនឹងគណបក្សកាន់អំណាចក្នុងការបោះឆ្នោតជាតិឆ្នាំ២០១៣ នេះ ត្រូវបានគេមើលឃើញយ៉ាងច្បាស់គឺ «គណបក្សសង្គ្រោះជាតិ»។ រឹតតែច្បាស់ នៅសល់ត្រឹមតែ មួយខែទៀតរដូវនៃយុទ្ធនាការឃោសនាបោះឆ្នោតមកដល់ តែគណបក្សកាន់អំណាចបានកំដៅម៉ាស៊ីន ត្រៀមខ្លួនយកប្រៀបខាងយុទ្ធសាស្រ្ត រួចជាស្រេច។ យុទ្ធសាស្រ្តប្រើប្រាស់អ្នកដែលមានភក្តីភាពនឹងខ្លួន ដោយមិនខ្វល់ ឬមិនចង់បានពីមុខម៉ាត់ និងសេចក្តីថ្លៃថ្នូក្នុងនាមជាអ្នកនយោបាយចាស់ទុំម្នាក់។ ជាក់ស្តែង គេឃើញមានការប្រើប្រាស់ប្រព័ន្ធផ្សព្វផ្សាយដើម្បីស្រែកលើកទឹកចិត្តពីលោកនាយករដ្ឋមន្រ្តី ប្រកាសបើកដៃគៀងគររាស្រ្ត[ដែលគាំទ្រគណបក្សប្រជាជនកម្ពុជា-កំពុងកាន់អំណាចបច្ចុប្បន្ន] អោយរៀបក្បួនបាតុកម្មអហិង្សាប្រឆាំងនឹងមេដឹកនាំគណបក្សប្រជែងគ្រប់ទីកន្លែង មានគោលដៅច្បាស់គឺ លោក កឹម សុខា ប្រធានស្តីទី គណបក្សសង្រ្គោះជាតិ ខណៈ លោក សម រង្ស៊ី ប្រធានគណបក្សមិនអាចចូលស្រុកខ្មែរបាន។ មិនត្រឹមតែប៉ុណ្ណោះ លោក នាយករដ្ឋមន្រ្តីខ្មែរដដែល បានចោទប្រកាន់ លោក កឹម សុខា បានថា រួមភេទជាមួយអនីតិជន តែមិនមាន ទុក្ខទោស ដោយគុណបុណ្យអន្តរាគមន៍ របស់ នាយករដ្ឋមន្ត្រី (ហាក់ភ្លេចគិតថា គាត់ចូលរួមគំនិត ល្មើសច្បា់ប់ ឬបង្ហាញយ៉ាងច្បាស់ ពីនិទណ្ឌភាពក្នុងប្រទេស កម្ពុជា មាន នាយករដ្ឋមន្ត្រីគាំទ្រ។ អីយ៉ា បុរសខ្លាំងម្នាក់ហ្នឹង មានអំណាចអស្ចារ្យមែន ហើយក៏មានរឿងរ៉ាវស្នេហា មិនធម្មតាដែរ)។ ទោះបីជាយ៉ាងនេះក្តី សម្រាប់អ្នកតាមដាននយោបាយកម្ពុជា ហាក់មិនទាន់ប្លែកចិត្តទេ ដែលឃើញមានការវាយប្រហារលើបុគ្គល ពីសំណាក់អ្នកនយោបាយបែបនេះ តែអ្វីដែលប្លែក គឺលោកនាយករដ្ឋមន្រ្តី បែរជា ប្រកាសថា គណបក្សប្រជាជនកម្ពុជា មិនមែនអ្នកគាំទ្រ បាតុកម្មប្រឆាំងលោក កឹមសុខា។ ការនិយាយបែបនេះ ទំនងជា ចង់ប្រកាស់ថា ខ្លួនលោកដែលបានស្រែកក្តែងៗកន្លងមកមិនមែនជា សម្លេងមកពី គណបក្សប្រជាជនកម្ពុជាទេ គ្រាន់ជា សម្លេងរបស់បុរសខ្លាំងម្នាក់។
ពិធីសម្ពោធអគារគណៈកម្មាធិការជាតិអូឡាំពិកកម្ពុជា នៅជាប់ស្តាតអូឡាំពិក រាជធានីភ្នំពេញ នៅព្រឹកថ្ងៃទី១៣ ខែមិថុនា លោកនាយករដ្ឋមន្ត្រី ហ៊ុន សែន បានបដិសេធការចោទប្រកាន់ដែលថា គណបក្សប្រជាជនកម្ពុជា ជាអ្នកគាំទ្រលោក ជុំ ម៉ី ដឹកនាំធ្វើបាតុកម្មប្រឆាំងលោក កឹម សុខា ប្រធានទីស្ដីការគណបក្សសង្គ្រោះជាតិ។ ជាមួយគ្នានេះ លោក ហ៊ុន សែន បានស្នើឲ្យលោក ជុំ ម៉ី និងជនរងគ្រោះក្នុងរបបខ្មែរក្រហម ផ្អាកធ្វើបាតុកម្មប្រឆាំងលោក កឹម សុខា និងរកវិធីតវ៉ាផ្សេងដើម្បីឲ្យការឃោសនា និងការបោះឆ្នោត ខែកក្កដា ខាងមុខ មានបរិយាកាសល្អ៖ «សូមលោកកុំភណ្ឌច្រឡំ បើសិនមានមេដឹកនាំគណបក្សប្រជាជន ពិសេស ហ៊ុន សែន ចេញមុខ ឬ ហេង សំរិន ចេញមុខ ឬអ្នកដឹកនាំដទៃទៀតជាសមាជិកអចិន្ត្រៃយ៍ចេញមុខពិតប្រាកដ កម្រិតអស់លោកគាំទ្រអត់បានទេ។ បើអស់លោកមិនរត់ចូលដេកក្នុងស្ថានទូតបរទេសទេ ខ្ញុំថ្វាយបង្គំ»។ (អានបន្ថែម ៖ វិទ្យុអាស៊ីសេរី ផ្សាយថ្ងៃទី១៣ មិថុនា ២០១៣ លោក ហ៊ុន សែន អំពាវនាវឲ្យលោក ជុំ ម៉ី ផ្អាកធ្វើបាតុកម្ម)
ម្ចាស់ឆ្នោត ដែលយល់ដឹងពី ការបោះឆ្នោត អាចនឹងនឿយណាយក្នុងការបោះឆ្នោត ព្រោះ គណបក្សកាន់អំណាច ហាក់មិនចាប់អារម្មណ៍នឹងមុខម៉ាត់កម្ពុជា នៅក្នុងឆាកអន្តរជាតិទេ ទោះបីជា អ្នកសង្កេតការណ៍អន្តរជាតិដូចជា សហភាពអឺរ៉ុប ប្រកាសមិនបញ្ជូនអ្នកសង្កេតការណ៍មកចូលរួមក្នុងការបោះឆ្នោតខែកក្កដា ខាងមុខ តែ លោកនាយករដ្ឋមន្រ្តីខ្មែរ បែរជា ប្រកាសអញ្ជើញប្រទេសដៃគូក្នុងអាស៊ាន អោយបញ្ជូនអ្នកសង្កេតការណ៍ជំនួសអ្នកជំនាញសង្កេតការបោះឆ្នោតវិញ។ គេឃើញថា គ.ជ.ប ដែលតែងរងការចោទប្រកាន់ថា លម្អៀងទៅរកគណបក្សកាន់អំណាច ជាអ្នកចេញមុខអញ្ជើញប្រទេសមួយចំនួនមកសង្កេតការណ៍ ឬគ្រាន់ផ្តល់សេចក្តីគាំទ្រដល់ រដ្ឋាភិបាលថ្មីដែលកើតចេញពីការបោះឆ្នោតមិនស្មើភាពមួយ។ ផ្ទុយទៅវិញ មេដឹកនាំ សម រង្ស៊ី ដែលមិនអាចចូលស្រុកវិញ បែរខំស្រែកមិនទទួលស្គាល់លទ្ធផលបោះឆ្នោត ទោះបីជា រដ្ឋាភិបាលបង្កើតដោយគណបក្សប្រឆាំងក៏ដោយ។ ទង្វើបែបនេះ ហាក់បង្ហាញឱកាសបែកបាក់ផ្ទៃក្នុង ឬភាពមិនទុកចិត្តរវាង មេដឹកនាំគណបក្សប្រឆាំង ដែលទើបតែ ព្រមបោះទុន បង្កើតគណបក្សប្រឆាំងរួមគ្នា ក្នុងការបោះឆ្នោតជ្រើសតាំងតំណាងរាស្រ្តអាណត្តិទី៥ (២០១៣-២០១៨)។ លោក សម រង្ស៊ី ធ្លាប់បញ្ឆោត លោក កឹម សុខា ម្តងរួចមកហើយ កាលពីដើមនីតិកាលទី៤ ហើយតម្រុយថ្មីៗបែបនេះ បានបង្ហាញយ៉ាងច្បាស់ថា មេដឹកនាំគណបក្សប្រឆាំង កំពុងតែយល់ច្រឡំ ឬមិនទាន់យល់ចិត្តគ្នា ឬមិនទាន់អាចរួបរួមស្ថានការណ៍ក្នុងបក្ស ដូច គណបក្សកាន់អំណាច បក្សប្រជាជនកម្ពុជាទេ។
សម្រាប់ម្ចាស់ឆ្នោតទូទៅ ពួកគេមិនខ្វល់ថា នរណាជាអ្នកកាន់អំណាច តែពួកគេចង់ឃើញសេដ្ឋកិច្ច និងស្ថេរភាពនយោបាយ ក្នុងប្រទេសមានការលូតលាស់។ ទោះបីជាយ៉ាងណា អ្នកវិភាគផ្តល់យោបល់ថា អ្នកវិនិយោគមានការកើនឡើង ឬថយចុះ វាជាការវាស់វែងយ៉ាងច្បាស់លាស់មួយថា តើស្ថេរភាពនយោបាយកម្ពុជា ដើរទៅមុខ ឬថយក្រោយ។
ថ្ងៃនេះមានបាតុកម្មធំមួយក្នុងស្រុកខ្មែរ ខែមិថុនា 9, 2013
Posted by មេឃា in Cambodia Feature Stories.Tags: Demonstration in Cambodia
add a comment
ដូចការគ្រោងទុកចឹង លោក ជុំ ម៊ី អតីតអ្នកទោសគុកទោសស្លែង បានចេញមុខដឹកនាំ បាតុកម្មដ៏ធំមួយ ធ្វើឡើងទាំងក្នុងរាជធានី និងបណ្តាខេត្ត ប្រឆាំងនឹង អ្នកតំណាងរាស្រ្តខ្មែរមណ្ឌលកំពង់ចាម លោក កឹម សុខា កាលពីព្រឹកថ្ងៃទី៩ ខែមិថុនា។
ពិសេសជាង បាតុកម្មមុនៗ ដែលរដ្ឋាភិបាល តែងបង្រ្កាប ឬរារាំង ហើយពលរដ្ឋខ្មែរ មិនអាច ឃើញទម្រង់ បាតុកម្ម នានា តាមកញ្ចក់ទូរទស្សន៍ លើកនេះស្ថានីយទូរទស្សន៍ក្នុងស្រុកមួយចំនួនក្នុងនោះរួមមាន ទូរទស្សន៍ បាយ័ន ស៊ីធីអិន បានផ្សាយផ្ទាល់ពី ព្រឹត្តិការណ៍នេះ ដោយបង្ហាញ និងអត្ថាធិប្បាយ ថា ចំនួនអ្នកចូលរួមបាតុកម្ម ក្នុងក្រុងភ្នំពេញ អាចលើសពី ពីរម៉ឺននាក់ បើរាប់ទាំង បាតុករ ឈរលើកបដាប្រឆាំង លោក កឹម សុខា តាមសាលាមហាវិទ្យាល័យ នេះមិនទាន់រាប់ ដល់បណ្តាខេត្តមួយចំនួន ដែលបាតុកម្ម យ៉ាងច្រើនកុះករ ស្របពេលជាមួយគ្នា។ បាតុកម្មធំបែបនេះ ត្រូវបានពលរដ្ឋធម្មតា មើលឃើញច្បាស់ថា បាន ផ្តួចផ្តើមឡើងដោយ លោកនាយក រដ្ឋមន្រ្តី ហើយទទួលបានការគាំទ្រ ទាំងថវិកា ទឹកចិត្ត និងសម្ភារៈ ពី តំណាងរាស្រ្ត និងមេឃុំគណបក្សកាន់អំណាច មន្រ្តីរាជការ សាស្រ្តាចារ្យ និស្សិត អ្នកគាំទ្រគណបក្សប្រជាជនកម្ពុជា រាប់បញ្ចូលទាំង ប្រព័ន្ធផ្សព្វផ្សាយ វិទ្យុ ទូរទស្សន៍ កាសែតអ៊នឡាញ ។ល។ បើសួររកមូលហេតុ ហ្វូងបាតុករ គឺខឹងសម្បានឹង លោក កឹម សុខា ដោយសារលោក ប្រើពាក្យថា គុកទួលស្លែងជា គុកសិប្បនិមិត្ត ទើបនាំអោយ ផ្ទុះកំហឹងនេះឡើង បំណងធំ ពួកគេចង់បានពាក្យ សុំទោស និងពិធីសុំខមាលទោស ដោយអុធធូប ពីអ្នកតំណាងរាស្រ្តគណបក្សប្រឆាំង។ បាតុកម្ម ត្រូវបញ្ចប់ ក្រោយពេល បាតុករប្រមាណ ៥០០នាក់ ដង្ហែរញាតិរបស់លោក ជុំ ម៊ី បញ្ជូនដល់ ស្នាក់ការ គណបក្សសង្គ្រោះជាតិ ហើយត្រូវបានទទួល (ញាតិ) ដោយ លោកជំទាវ មូ សុខហួ ខណៈដែល លោក កឹម សុខា កំពុងចូលរួម វេទិកាមួយ នាខេត្តកំពត។ សម្រាប់ពលរដ្ឋ និងនិស្សិត ដែលចូលរួមសម្តែងមតិតាមរយៈការ បាតុកម្ម ប្រឆាំង លោក កឹម សុខា ថ្ងៃនេះ យ៉ាងហោចណាស់ ក៏អាចទទួលបាន ថវិកា ពីរម៉ឺនរៀល ពី លោកនាយករដ្ឋមន្រ្តី។
ដំណឹង ៖ ត្រូវការទិញប្លុក ខែមករា 31, 2013
Posted by មេឃា in កំណត់ហេតុមេឃា, Cambodia Feature Stories.11 comments
អ្នកធ្លាប់គិតថា ចង់លក់ប្លុករបស់អ្នកទេ ? បើលក់… តើចង់លក់ក្នុងតម្លៃប៉ុន្មាន ?
មិនមែនខ្ញុំជាអ្នកត្រូវការទិញប្លុកទេ សូមកុំទាន់យល់ច្រឡំ ! នេះគ្រាន់តែជា ដំណឹងមួយ ឃោសនាថា មានគេហទំព័រ មួយ ឈ្មោះថា Statscrop or www.statscrop.com មានកម្មវិធី វាយតម្លៃប្លុករបស់ អ្នក ហើយនេះក៏ជា កម្លាំងលើកទឹកចិត្តមួយ ដល់អ្នកសរសេរប្លុកទាំងឡាយ ដើម្បីដឹងថា តម្លៃប្លុករបស់អ្នកថ្លៃប៉ុន្មាន ? សូមបន្តបច្ចុប្បន្នភាព ប្លុករបស់អ្នកទៀត ក្រែងលោ អាចលក់បានរាប់លានដុល្លារ។ មិនមែនជា រឿងដែលអស់សំណើចទេ ព្រោះប្លុកមួយ ជាភាសាអង់គ្លេស Huffington Post ដែលសរសេរពី សង្រ្គាមក្នុង ប្រទេសអាហ្វានីស្ថាន ធ្លាប់លក់បាន រាប់លានដុល្លារ ទៅអោយ គេហទំព័រសារព័ត៌មានមួយរួចហើយ ដោយសារ ប្លុកនេះ មានអ្នកមើលច្រើន។ សរសេរលេងលេង តែមានលុយមែនទែន !
ជាលទ្ធផល មានប្លុកខេមរភាសា ស្រែខ្មុក មួយ [ sopheak.wordpress.com ] ត្រូវបានគេហទំព័រនោះ ផ្តល់តម្លៃ ៣៨៦១ ដុល្លារ… ចុះប្លុកអ្នកវិញ ? សាកល្បង Statscrop
Asva the Monkey HD on App Store ខែធ្នូ 19, 2012
Posted by មេឃា in កំសាន្ត/Entertainment, Cambodia Feature Stories.add a comment
ព្រះមេរុសម្រាប់ថ្វាយព្រះភ្លើងព្រះបរមសពព្រះមហាវីរក្សត្រ តម្លៃត្រឹម ១លាន២សែនដុល្លារប៉ុណ្ណោះ ខែធ្នូ 18, 2012
Posted by មេឃា in នាយករដ្ឋមន្ត្រី, Cambodia Feature Stories, KING -ព្រះមហាក្សត្រ.add a comment
ក្នុងពេលត្រួតពិនិត្យការដ្ឋានសាងសង់ព្រះមេរុសម្រាប់ថ្វាយព្រះភ្លើងព្រះបរមសព ព្រះបាទ នរោត្តម សីហនុ នៅព្រឹកថ្ងៃអង្គារ ទី១៨ ខែធ្នូនេះ លោកនាយករដ្ឋមន្ត្រី ហ៊ុន សែន បានប្រាប់អ្នកសារព័ត៌មានថា ទឹកប្រាក់សរុបដែលចំណាយលើការកសាងព្រះមេរុ អស់ប្រាក់តិចជាង ១លាន២សែនដុល្លារ តែប៉ុណ្ណោះ។
លោកនាយករដ្ឋមន្ត្រីបន្ថែមថា គម្រោងសាងសង់នេះ គឺមិនត្រូវបានដាក់ឲ្យដេញថ្លៃទេ ព្រោះអាចនាំឲ្យយឺតពេលក្នុងការសាងសង់។ ការសាងសង់ព្រះមេរុសម្រាប់ថ្វាយព្រះភ្លើងនេះ ត្រូវចំណាយពេលប្រមាណជាង ៣ខែ ហើយប្រើប្រាស់កម្មករប្រមាណ ៣៤៣នាក់។ លោកមានប្រសាសន៍ថា «ការសាងសង់នេះ គឺរដ្ឋាភិបាលបានឲ្យក្រុមហ៊ុនកូនរបស់លោក គង់ សំអុល រដ្ឋមន្រ្តីក្រសួងព្រះបរមរាជវាំងសាងសង់»។
ការលើកយកប្រធានបទ តម្លៃសាងសង់ព្រះមេរុ ប្រាប់អ្នកសារព័ត៌មាន ចំៗបែបនេះ ព្រោះលោកនាយករដ្ឋមន្រ្តី ចង់ប្រតិកម្មទៅនឹងសេចក្តីរាយការណ៍របស់ អ្នកនាំពាក្យខុទ្ទកាល័យព្រះបរមរាជវំាង ព្រះអង្គម្ចាស់ ស៊ីសុវត្ថិ ធម្មិកោ ទៅសារព័ត៌មាន កាលពីថ្ងៃអាទិត្យ ទី១៦ ខែធ្នូ ថា សំណង់ព្រះមេរុ នេះ ចំណាយអស់ជិត ៥លានដុល្លារ។ លោកនាយករដ្ឋមន្រ្តី ក៏បានព្រមានទៅ ព្រះអង្គម្ចាស់ ស៊ីវត្ថិ ធម្មិកោ ថា «បើមិនដឹងច្បាស់ទេ កុំរាយការណ៍ គួរតែសួរ រដ្ឋាភិបាល ឬក្រសួងព្រះបរមរាជវាំងសិន» ។
ឆ្លើយតបនឹងការលើកឡើងរបស់លោកនាយករដ្ឋមន្រ្តី ព្រះអង្គម្ចាស់ ស៊ីសុវត្ថិ ធម្មិកោ មានបន្ទូលតាមរយៈអ្នកសារព័ត៌មានយ៉ាងខ្លីថា ព្រះអង្គទទួលកំហុស ប្រសិនបើព្រះអង្គមានបន្ទូលខុស។
តាមគម្រោង ព្រះបរមសពរបស់ព្រះមហាវីរក្សត្រ នរោត្តម សីហនុ នឹងត្រូវបូជានៅ វាលព្រះមេរុ ជាសាធារណៈ នៅថ្ងៃទី៤ ខែកុម្ភៈ ឆ្នាំ២០១៣ ខាងមុខនេះ៕
ព័ត៌មានបន្ថែម សូមរកអាន VOD
បណ្តឹងធានា ម៉ម សូណង់ដូ នៅក្រៅឃុំ ទំនងបញ្ជូនដល់តុលាការកំពូលត្រឹមសប្តាហ៍នេះ ខែធ្នូ 18, 2012
Posted by មេឃា in កខគឃង, Cambodia Feature Stories.add a comment
ប្រធានក្រឡាបញ្ជីសាលាឧទ្ធណ៍ លោក ប៊ុន សាវ៉ាត ប្រាប់ VOD នៅព្រឹកថ្ងៃច័ន្ទ ទី១៧ ខែធ្នូ នេះថា សាលាឧទ្ធរណ៍កំពុងធ្វើការត្រួតពិនិត្យលើបណ្តឹងសារទុក្ខ របស់ លោក ម៉ម សូណង់ដូ រួចនឹងបញ្ជូនទៅកាន់តុលាការកំពូល ឲ្យបានមុនចុងសប្តាហ៍នេះ ៖ “គេកំពុងរៀបចំ គេត្រូវបញ្ជូនឲ្យលឿន ប៉ុន្តែគ្រាន់តែគ្នាធ្វើមិនទាន់ កំពុងរៀបចំ ខ្ញុំកំពុងតាមដានមើលដែរហ្នឹង កំពុងជំរុញឲ្យមន្ត្រីធ្វើឲ្យលឿនឲ្យ ចំាមើលតាមធម្មតាវាត្រូវបញ្ជូនឲ្យបានមុនក្នុងសប្តាហ៍ ហ្នឹង”។
នៅថ្ងៃទី១៤ ខែធ្នូ តុលាការសាលាឧទ្ធរណ៍ បានសម្រេចបដិសេធពាក្យស្នើសុំនៅក្រៅឃុំបណ្ដោះអាសន្នដែលបានស្នើ ដោយមេធាវីរបស់លោក ម៉ម សូណង់ដូ ខណៈពេលដែលលោកមានជំងឺ និងសុខភាពចុះខ្សោយ។
លោក ម៉ម សូណង់ដូ ប្រធានវិទ្យុសំបុកឃ្មុំ និងជាប្រធានសមាគមអ្នកប្រជាធិបតេយ្យ ត្រូវបានចាប់ខ្លួននៅថ្ងៃទី១៥ ខែកក្កដា ឆ្នាំ២០១២ ហើយសាលាដំបូងបានកាត់ទោសលោកជាប់គុក ២០ឆ្នាំ និងពិន័យប្រាក់ចំនួន ១០លានរៀល ពីបទញុះញង់ឲ្យមានការប្រឆាំងមន្ត្រីរាជការសាធារណៈ និងបទធ្វើអបគមន៍នៅភូមិប្រម៉ា ឃុំកំពង់ដំរី ស្រុកឆ្លូង ខេត្តក្រចេះ។
សម្រាប់ព័ត៌មានលម្អិត សូមរកអាន VOD
រដ្ឋាភិបាលកម្ពុជា មិនទាន់ល្អ ខែធ្នូ 6, 2012
Posted by មេឃា in Cambodia Feature Stories.add a comment
លោក កែម ឡី បានបញ្ជាក់ថា នៅក្នុងសង្គមប្រជាធិបតេយ្យ តួនាទីរបស់រដ្ឋាភិបាលមានដែនកំណត់ សង្គមប្រជាធិបតេយ្យ៖ «ដែន កំណត់ហ្នឹងមិនជ្រៀតជ្រែកតុលាការ មិនជ្រៀតជ្រែកកិច្ចការនីតិប្បញ្ញត្តិ ហើយផ្ដល់ឱកាសឲ្យអង្គការសង្គមស៊ីវិលនានាឲ្យធ្វើជាដៃគូរបស់ រដ្ឋាភិបាល»។
សម្រង់អត្ថបទ វិទ្យុអាស៊ីសេរី ផ្សាយថ្ងៃទី០៤ ខែធ្នូ ឆ្នាំ២០១២
ក្រុមអ្នកឃ្លាំមើលសង្គម បានលើកឡើងថា រដ្ឋាភិបាលកម្ពុជា ត្រូវតែធ្វើសកម្មភាពបំពេញបន្ថែមនូវចំណុចខ្វះខាតរបស់ខ្លួនឲ្យបាន ពេញលេញ ដើម្បីឆ្លើយតបទៅនឹងគោលដៅសំខាន់ៗដែលមានចែងនៅក្នុងច្បាប់កំពូល របស់ប្រទេស។
អ្នកឃ្លាំមើលផ្នែកអភិវឌ្ឍន៍សង្គម លោក កែម ឡី មានប្រសាសន៍ថា រដ្ឋាភិបាលមានតួនាទី និងកាតព្វកិច្ចសំខាន់ៗមួយចំនួន រួមមាន យន្តការគ្រប់គ្រងស្ថាប័នរបស់រដ្ឋតាំងពីថ្នាក់ជាតិ និងថ្នាក់ក្រោមជាតិ ការបង្កើតទំនាក់ទំនងការទូត ការផ្ដល់សេវាសាធារណៈ ការធានានូវសណ្ដាប់ធ្នាប់សង្គម ការធានានូវការអភិវឌ្ឍសេដ្ឋកិច្ច ការធានានូវសិទ្ធិសង្គមកិច្ច ការធានាឲ្យមានការគោរពសិទ្ធិមនុស្ស និងគោលដៅអភិវឌ្ឍន៍សហស្សវត្ស និងផ្សេងៗទៀត។
លោក កែម ឡី បានលើកឡើងទៀតថា រដ្ឋាភិបាលមិនទាន់បំពេញតួនាទី និងកាតព្វកិច្ចល្អនៅក្នុងការដឹកនាំប្រទេសបានល្អនៅឡើយទេ។ នៅមានចំណុចមួយចំនួនទៀតដែលរដ្ឋាភិបាលគួរតែយកចិត្តទុកដាក់ និងបំពេញកាតព្វកិច្ចរបស់ខ្លួន សមទៅនឹងអ្វីដែលមានចែងនៅក្នុងរដ្ឋធម្មនុញ្ញ និងសេចក្ដីប្រកាសរបស់អង្គការសហប្រជាជាតិ ដែលខ្លួនបានទទួលស្គាល់ហើយនោះ។ លោក កែម ឡី បានបញ្ជាក់ថា រដ្ឋាភិបាលធ្វើមិនល្អនោះមានផ្នែកសង្គមកិច្ច និងផ្នែកផ្សេងៗមួយចំនួនទៀត៖ «ផ្នែកសង្គមកិច្ចហ្នឹងដោយសារតែ រដ្ឋាភិបាលមិនទាន់រៀបឲ្យមានសមភាពសេដ្ឋកិច្ច ការទទួលបានឱកាសបានស្មើៗគ្នា ការទទួលគាំទ្រខាងផ្នែកសង្គមកិច្ច យើងឃើញតែយើងធ្វើអត់បាន យើងមានមនុស្សជរាជិត ១លាននាក់ កំពុងប្រឈមនឹងភាពក្រីក្រ ទី២ កុមារគ្មានទីពឹង កុមារអនាថា កុមារក្រីក្រ ក៏កំពុងតែប្រឈមនឹងបញ្ហាលំបាក»។
អ្នកជំនាញផ្នែកវិទ្យាសាស្ត្រនយោបាយ និងជាអ្នកវិភាគឯករាជ លោកបណ្ឌិត សុខ ទូច បានពន្យល់ថា ប្រទេសកម្ពុជា ជាប្រទេសកំពុងអភិវឌ្ឍន៍ ដូច្នេះរដ្ឋាភិបាលកំពុងតែបំពេញដំណើរនៃកាតព្វកិច្ចរបស់ខ្លួន។ ប៉ុន្តែបញ្ហានៅត្រង់ថា កាតព្វកិច្ចទាំងអស់នោះ រដ្ឋាភិបាលមិនទាន់ធ្វើបានពេញលេញទេនោះ ដូចជា រដ្ឋធម្មនុញ្ញកម្ពុជា ចែងថា ប្រជាពលរដ្ឋទាំងអស់មានសិទ្ធិស្មើគ្នានៅចំពោះមុខច្បាប់ ផ្ទុយទៅវិញ ការអនុវត្តច្បាប់នៅពេលបច្ចុប្បន្នមិនទាន់ស្របទៅនឹងអ្វីដែលមាន ចែងនៅក្នុងរដ្ឋធម្មនុញ្ញនោះទេ៖ «ខ្លះទៅអនុវត្តច្បាប់លឿនទៅ ខ្លះទៀតអនុវត្តច្បាប់យឺត។ មកទល់ពេលនេះមិនទាន់អនុវត្តច្បាប់តុលាការនៅតាមរកនីតិវិធីបំពេញ បន្ថែមទៅ អីចឹងទេ មិនទាន់ដំណើរការបានស្មើៗគ្នាទៅតាមដែលថាប្រជាពលរដ្ឋមានសិទ្ធិ ស្មើគ្នាចំពោះមុខច្បាប់ សង្គមមួយទទួលបានភាពយុត្តិធម៌ គឺមនុស្សទាំងអស់ទទួលបានយុត្តិធម៌ស្មើៗគ្នា គ្មានទាបគ្មានខ្ពស់ គេហៅថា នីតិរដ្ឋនោះ កម្ពុជា មិនទាន់មានទេ»។
គម្រោងយុត្តិធម៌ពិភពលោក (WJP) បានសរសេរលំអិតនៅក្នុងរបាយការណ៍ប្រចាំឆ្នាំ២០១២ របស់ខ្លួនថា កម្ពុជា ធ្លាក់ចុះនូវការគោរពច្បាប់ និងការបោះជំហានឆ្ពោះទៅរកនីតិរដ្ឋ។ ក្នុងរបាយការណ៍សរសេរថា ប្រទេសកម្ពុជា មានពិន្ទុទាបបំផុតក្នុងតំបន់អាស៊ីបូព៌ា និងប៉ាស៊ីហ្វិក ពីព្រោះថា ការអនុវត្តច្បាប់ និងយុត្តិធម៌ស៊ីវិល នៅទូទាំងពិភពលោក កម្ពុជា ជាប់ចំណាត់ថ្នាក់លេខ ៩៤ ក្នុងចំណោមប្រទេសចំនួន៩៧។
អ្នកវិភាគបានពន្យល់ថា រដ្ឋាភិបាលត្រូវធានាឲ្យពលរដ្ឋរបស់ខ្លួនមានសិទ្ធិរស់រានមានជីវិត សមរម្យ និងមានទីជម្រកសមរម្យជាដើម។ ផ្ទុយទៅវិញ ការអភិវឌ្ឍរបស់រដ្ឋាភិបាលនៅតំបន់មួយចំនួននោះ មិនមែនជាសកម្មភាពធានាឲ្យប្រជាពលរដ្ឋមានទីជម្រករស់នៅសមរម្យដូច ដែលមានចែងនៅក្នុងច្បាប់នោះទេ។ ឧទាហរណ៍ ករណីអភិវឌ្ឍនៅតំបន់បឹងកក់ និងបុរីកីឡា ជាដើម។
មន្ត្រីនាំពាក្យនៃទីស្ដីការគណៈរដ្ឋមន្ត្រី លោក ផៃ ស៊ីផាន បានបកស្រាយថា រដ្ឋាភិបាលកំពុងតែយកចិត្តទុកដាក់ និងបំពេញកាតព្វកិច្ចរបស់ខ្លួនទៅតាមជំហានដែលខ្លួនអាចធ្វើទៅបាន។ លោក ផៃ ស៊ីផាន អះអាងថា ប្រទេសជឿនលឿនមួយចំនួនក៏មិនអាចបំពេញកាតព្វកិច្ចក្នុងពេលតែមួយ បានល្អទាំងស្រុងនោះដែរ គេធ្វើទៅតាមដំណាក់កាលៗ៖ «ដូច្នេះ អ្វីៗមានតម្លៃរបស់វា អ្វីដែលយើងកំពុងតែដើរ យើងថែរក្សាឲ្យមានសន្តិភាព ស្ថិរភាពនៅក្នុងសង្គម ទី២ រក្សានូវការអភិវឌ្ឍ វឌ្ឍនភាពនៃសេដ្ឋកិច្ច ការរីកចម្រើននៃសេដ្ឋកិច្ច (Economic Growth)»។
ក្រុមអ្នកច្បាប់បានបំភ្លឺថា កាតព្វកិច្ចរបស់រដ្ឋាភិបាលមានចែងច្បាស់លាស់នៅក្នុងរដ្ឋធម្មនុញ្ញ ដែលជាច្បាប់កំពូលដែលកំណត់តួនាទីរបស់រដ្ឋាភិបាល ហើយរដ្ឋាភិបាលតំណាងឲ្យអំណាចនីតិប្រតិបត្តិ ពោលគឺមានតួនាទីអនុវត្តច្បាប់ ជាស្ថាប័នមានតួនាទីអនុវត្តច្បាប់ ធ្វើយ៉ាងណាឲ្យរដ្ឋធម្មនុញ្ញការពាររដ្ឋធម្មនុញ្ញ មានន័យថា រាល់កាតព្វកិច្ចដែលរដ្ឋធម្មនុញ្ញចែង រដ្ឋាភិបាលត្រូវបំពេញតួនាទីនោះ ពិសេសត្រូវការពារសិទ្ធិ និងសេរីភាពរបស់ប្រជាពលរដ្ឋ។
ប្រធានក្រុមអ្នកច្បាប់ការពារសិទ្ធិកម្ពុជា លោកបណ្ឌិត សុខ សំអឿន បានលើកហេតុផលថា អ្វីដែលមានចែងនៅក្នុងរដ្ឋធម្មនុញ្ញ រដ្ឋាភិបាលត្រូវតែអនុវត្តនូវកាតព្វកិច្ចរបស់ខ្លួន ដូចជាសិទ្ធិ និងសេរីភាពប្រជាពលរដ្ឋជាដើម៖ «តាំងពីឆ្នាំ១៩៩៣ មក ពេលនេះជិត ២០ឆ្នាំហើយ រដ្ឋាភិបាលខំធ្វើច្បាប់ច្រើន តែមិនបានគោរពច្បាប់ឲ្យបានគ្រប់សព្វទៅតាមរដ្ឋធម្មនុញ្ញនោះទេ»។
លោកបណ្ឌិត សុខ សំអឿន បានលើកឡើងថា ការធ្វើសមាជជាតិមានសារសំខាន់ណាស់សម្រាប់ឲ្យប្រជាពលរដ្ឋពាំនាំនូវ អ្វីដែលជាក្ដីកង្វល់ និងបញ្ហាប្រឈមនានារបស់ពួកគេលើកទៅរដ្ឋាភិបាល ដើម្បីឲ្យជួយដោះស្រាយ ដូចដែលនៅក្នុងរបបសង្គមរាស្ត្រនិយម ដែលអតីតព្រះមហាក្សត្រ ព្រះករុណា សម្ដេចព្រះ នរោត្តម សីហនុ ធ្លាប់បានធ្វើនៅក្នុងពេលព្រះអង្គបានគ្រប់គ្រងប្រទេសនោះ។
មន្ត្រីនាំពាក្យនៃទីស្ដីការគណៈរដ្ឋមន្ត្រី លោក ផៃ ស៊ីផាន បានបំភ្លឺថា នៅក្នុងសម័យសង្គមរាស្ត្រនិយម គេធ្វើសមាជជាតិនោះដោយសារនៅក្នុងរបបនោះជារបបឯកបក្ស ប៉ុន្តែសព្វថ្ងៃ កម្ពុជា ជារបបប្រជាធិបតេយ្យ សេរីពហុបក្ស ដូច្នេះគណបក្សនយោបាយនីមួយៗបានធ្វើសមាជរបស់ខ្លួន ដើម្បីលើកពីបញ្ហានោះទៅរដ្ឋាភិបាលហើយ។
Cambodia Hyperlapse – Moving Timelapse ខែធ្នូ 5, 2012
Posted by មេឃា in កខគឃង, Cambodia Feature Stories.add a comment
Note from Youtube : A movie was made to stretch a creative and technical abilities – It has grown tired of the standard timelapse and wanted to push the genre in a more exciting direction.
Shot on a 7d (CANON)
~~~~~~
Please educate yourself about the horrible atrocities that are happening in Cambodia right now with child sex-trafficking and what can be done to bring an end to it http://agapewebsite.org/aims-story/